ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជូនពរសិស្សដែលត្រូវប្រឡងមធ្យមសិក្សាទុតិយភូមិ ឬបាក់ឌុប នៅថ្ងៃទី៥ ខែធ្នូ ឆ្នាំ២០២២ សូមមានសុខភាពល្អនិងមានជោគជ័យ។
សម្ដេចតេជោ ហ៊ុន សែន បានសរសេរនៅលើហ្វេសបុកផេករបស់សម្ដេចនៅថ្ងៃទី៤ ខែធ្នូនេះថា៖ «សូមជូនពរចៅៗដែលនឹងត្រូវប្រឡងមធ្យមសិក្សាទុតិយភូមិនៅថ្ងៃស្អែកនិងខានស្អែកសូមមានសុខភាពល្អនិងមានជោគជ័យ។ ទុកចិត្តលើក្រសួងអប់រំលើលោកគ្រូអ្នកគ្រូលើរដ្ឋបាលគ្រប់ជាន់ថ្នាក់ការពារដល់ចៅៗរាប់ទាំងកូវីដ-១៩ផង»។
គូសបញ្ជាក់ថា នៅសម័យប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី០៥-០៦ ខែធ្នូខាងមុខនេះ សហភាពសហព័ន្ធយុវជនកម្ពុជា (ស.ស.យ.ក.) នឹងសហការជាមួយអភិបាលរាជធានី-ខេត្ត រៀបចំកន្លែងស្នាក់នៅ និងរៀបចំកន្លែងផ្ញើកង់ម៉ូតូដោយឥតគិតថ្លៃដល់បេក្ខជនដែលមកពីបណ្តាស្រុក ក្រុង។
ការប្រឡងបាក់ឌុបឆ្នាំនេះមានបេក្ខជនចុះឈ្មោះប្រឡងបាក់ឌុបសរុបចំនួនជាង ១២ម៉ឺននាក់ ស្រីចំនួនជាង ៦ម៉ឺននាក់។ មណ្ឌលសំណេរមានចំនួន ២២១មណ្ឌល ត្រូវជា ៥ ១៧៤បន្ទប់ និងមានគណៈមេប្រយោគ និងគណៈកម្មការនានា ចូលរួមត្រួតពិនិត្យដំណើរការប្រឡងសរុបចំនួន ២៧ ៧៥៣នាក់។
ការប្រកាសលទ្ធផលប្រឡងនឹងធ្វើឡើងនៅរសៀលថ្ងៃទី២៧ ខែធ្នូ ឆ្នាំ២០២២ សម្រាប់បេក្ខជននៅរាជធានីភ្នំពេញ និងខេត្តកណ្តាល ហើយសម្រាប់ខេត្តដទៃទៀត ក្រសួងនឹងប្រកាសនៅព្រឹកថ្ងៃទី២៨ ខែធ្នូ ឆ្នាំ២០២២៕
